E humu i nā palaka lole!
Ua hoʻāhu ʻia kekahi mau ʻīā a ʻāpana lole me ka ʻike ʻole i ka mea e humu ʻia. ʻOiai ke kau nui nei ka manaʻo no nā ʻohana keiki a moʻopuna i kēia mau lā, ua hoʻoholo ʻia ka humu ʻana i kekahi mau palaka lole. He mea pāʻani maikaʻi loa ka palaka lole no nā kamaliʻi ʻoiai he mea ia e hoʻokamaʻāina a aʻoaʻo ai i ke keiki no nā lonoa hoʻopā me nā lonoa maka, keu hoʻi inā he ʻokoʻa nā hiʻonapāʻili o nā ʻāpana lole a lipine e hoʻohana ʻia ana no ia palaka. He mea ka palaka e kia ai ke keiki ma nā mākau lima kekahi. Inā he kanaka humuhumu ʻoe, e maʻalahi ana kēia hana. Inā ʻakahi ʻoe a hoʻomaka i ka humuhumu ʻana, e hana mālie ʻoe a e kō mai ana ka hua. Eia ke kaʻina i hoʻohana ʻia...
ʻAkahi - E ʻohiʻohi i nā pono. Ke mākaukau ʻole nā lako, hoʻopaneʻe ʻia ka hana. E hōʻoia i ka loaʻa o kēia mau lako, a i ʻole kekahi pani kūpono.
Mīkini humuhumu
1 Pōkaʻa lopi (ua lawa ka ʻeleʻele a i ʻole ke keʻokeʻo)
ʻŪpā lole/ pahi pōʻai
Lāʻau ana/ papa ana
Nā pine
Nā ʻāpana lole (ma ʻō aku o ka 4”x4” ka nui)
Nā lipine lole (3 lipine ʻokoʻa ma ka liʻiliʻi loa)
1 kui lihilihi
1 ʻeke nui o ka pulupulu
1 kui humuhumu
Mea wāwahi kuʻina
Ke ʻohi ʻia nā lako, e hoʻomākaukau i kahi e humu ai (ma kahi e palaka maʻalahi ʻia ai ka mīkini humuhumu). E kūkulu ʻia ke pākaukau, e hoʻonoho ʻia ka noho, a e waiho ʻia nā lako a pau ma ke pākaukau.
ʻAlua - E ʻohi, ʻoki, a hoʻonoho i nā ʻāpana lole.
ʻOhi. Nāu e hoʻoholo inā makemake ʻoe e humu i palaka me nā ʻāpana lole like a i ʻole me nā ʻāpana lole like ʻole. Ua koho ʻia nā ʻāpana ʻokoʻa no kēia palaka.
ʻOki. E hoʻomākaukau mua i nā ʻāpana lole ma ke ʻoki ʻana i nā ʻāpana huinahā ma ka ʻehā (4) ʻīniha i ka ʻehā (4) ʻīniha. Mai hopohopo nui inā ʻaʻole pololei loa nā laina a i ʻole inā e kuʻuwelu ana ka ʻāpana lole. He hana noʻeau kēia, a e hiki ana ke hoʻoponopono ʻia ma ka humu ʻana.
Hoʻonoho. E wae i ʻeono (6) ʻāpana lole a e hoʻonoho ma ke ʻano he “T” naʻinaʻi. E hoʻonoho i nā ʻāpana me ka hōʻike ʻana i ka lau o ka ʻāpana lole.
ʻAkolu - E ʻoki, hoʻonoho a hoʻopaʻa pine i nā ʻāpana lipine.
ʻOki. E ʻoki i nā ʻāpana lipine ma ka ʻelua me ka hapa ʻīniha (2.5”). Ua ʻokiʻoki au i kekahi mau ʻāpana i ka wā hoʻokahi e hoʻohana ana i nā lipine no kekahi mau palaka. Ua hoʻohana pū au i kekahi mau lipine i ʻokoʻa ma ka waihoʻoluʻu, ka mānoanoa, a i ʻokoʻa ma ka hiʻonapāʻili kekahi.
ʻOiai he palaka pāʻani kēia na ke kamaliʻi, he kohu ka hoʻohana ʻana i nā ʻano lipine like ʻole e hoʻokamaʻāina ai i ke keiki i nā ʻano hiʻonapāʻili like ʻole. Ma kēia hoʻokamaʻāina ʻana e kualena ai ke keiki ma ka pāʻani a kilo i ka palaka - he pahuhopu nui ia a ka makua!
Hoʻonoho. E koho i kahi e humu ai i ka lipine. Ua hoʻomoe au i nā lipine i ʻokoʻa kona waihoʻoluʻu me nā ʻāpana lole i mea e ʻume ai i ka maka o ke kamaliʻi i kēia palaka. Hoʻonoho au i ka hapanui o nā lipine ma ʻelua (2) ʻaoʻao o ka ʻāpana lole o waena o ka “T” naʻinaʻi, a hoʻokahi (1) lipine ma kekahi o nā ʻāpana lole ʻē aʻe. ʻAʻohe naʻe lauana kikoʻī ma kēia hana. E koho i kekahi ʻaoʻao a e hoʻonoho i ka lipine ma laila.
Pine. Ke paʻa ka manaʻo no kahi e humu ʻia ai ka lipine, e hoʻopaʻa pine ʻoe i ka lipine. Mai hoʻopaʻa pine a kokoke i kekahi kūʻono. E waiho i ka hapa ʻīniha (0.5”) ma ka liʻiliʻi loa ma waena o kahi e hoʻopaʻa pine ʻia ai ka lipine me ke kūʻono o ka ʻāpana lole. E ʻopi i ka lipine a e hoʻopaʻa pine. Ke hoʻopaʻa pine ʻia ka lipine, e hoʻonoho ʻia kekahi māhele liʻiliʻi (he hapa kenimika [0.5knm] paha) o ka nā ʻaoʻao o ka lipine i ʻoki ʻia ma waho aku o ka ʻaoʻao o ka ʻāpana lole. Ke humu ʻia nā ʻaoʻao o nā ʻāpana lole, e humu pū ʻia ka lipine. He hana kēia e hōʻoia ai i ka paʻa o ka lipine ma ka humu ʻana.
ʻAhā - E humu a paʻa nā ʻāpana a pau me nā lipine ma ke ʻano he huapalapala “T” naʻinaʻi . E hana mālie ʻoe. E humu ʻia nā ʻaoʻao me ka hoʻokahi hapahā (¼) kōā ma ka mīkini humuhumu.
E hoʻomaka ʻoe ma ka humu ʻana i ka lālani o nā ʻāpana ʻehā (4) ma ke ʻano he huapalapala “L” naʻinaʻi. E hōʻoia i ka paʻa o nā lipine ma ia humu ʻana kekahi. Iā ʻoe e humu ana, e waiho i kekahi kōā ma kahi o nā kaʻe ʻāpana lole. Mai humu mai kekahi kaʻe a i kekahi kaʻe. E waiho i kēia kōā e kōkua ai ma ka hoʻopili ʻana i nā ʻaoʻao ʻāpana lole a paʻa kekahi huinahā nui.
Ke paʻa ka lalani “L” naʻinaʻi, e hoʻopaʻa i nā ʻāpana ʻelua (2) hou aku a paʻa ka “T” naʻinaʻi.
ʻAlima - E humu i nā ʻaoʻao a pau a paʻa nā ʻaoʻao ʻeono (6) o ka palaka - me ka waiho ʻana i kekahi puka ma ka ʻaoʻao ʻeono (6).
Ke paʻa nā ʻāpana lole a pau ma ka “T” naʻinaʻi, e hoʻomaka e humuhumu i nā ʻaoʻao a pau a paʻa ka huinahā nui.
Ma mua o ka hoʻopaʻa ʻana i ka ʻaoʻao hope, e waiho i waenakonu - ʻo ia hoʻi, e humuhumu mai kaʻe o ka ʻāpana a i waena ma nā ʻaoʻao ʻelua o ia ʻaoʻao ʻāpana lole hope. Ma ia kōā e ʻōkomo ʻia ai ka polaimaʻawe.
ʻAono - E lole i ka huinahā, hōʻoia i ka paʻa o nā kūʻono a e hoʻopihapiha. He hana mālie kēia.
E lole i ka huinahā. Iā ʻoe e lole ana, e hōʻoia i ka humu ʻia o nā ʻaoʻao a kūʻono a pau ma ka ʻōkomo ʻana i ka lihilihi hana lima i loko o ka puka me ka hou ʻana i nā kūʻono a hahai ʻana i nā kuʻina o ka huinanui.
Inā ua humu pono ʻia nā kūʻono a ʻaoʻao a pau, e hoʻomau ma ka lālau ʻana aku i ka polaimaʻawe me ka ʻōkomo mālie i loko o ka huinanui. E hoʻomau i ka hoʻopihapiha ʻana a piha pono ka huinahā. Nāu nō e hoʻoholo i ka palupalu me ka paʻapū o ka palaka.
ʻAhiku - E humu i ka puka me ke kui ma ka lima a paʻa.
Ke piha ka huinahā i ka polaimaʻawe kūpono, e pani i ka puka o ka huinahā ma ke kui lima ʻana i ka puka me ka lopi.
E kui i ka puka a paʻa ma ka humu ʻana ma ke ʻano e hūnā ʻia ai ka lopi ma ka hoʻopaʻa ʻana i nā ʻāpana lole kekahi i kekahi (kapa ʻia kēia kaila humu he “invisible stitch” ma waena o kekahi o ka poʻe humuhumu lole). Ke paʻa ka humu, e ʻoki i ka lopi e koe ana a ua paʻa iho kāu palaka!
