E kanu i nā ʻanoʻano!

I ka makahiki i hala iho nei, ʻo ia ia makahiki i laha maoli ai ka maʻi ahulau “Kolona,” i noho paʻa ai kekahi hapa nui o kākou ma ko kākou mau hale. Ma ia wā i ʻimi noʻeau ai kekahi o kākou i nā ala e hoʻopau ai i nā hola o ka noho kaʻawale a mehameha. ʻO kekahi hana i kaulana ma ia wā, ʻo ia hoʻi ke kanu ʻana i nā ʻano mea kanu like ʻole.



No kekahi, ʻo kēia ka makamua o kona kanu ʻana, a no kekahi aku, he hoʻomaʻemaʻe pā hale a hoʻāʻo hou i ke kanu ʻana. Noʻu iho, ua hoʻāʻo māua ʻo kaʻu ipo e kanu ma nā ʻano kaila like ʻole: ʻo ke kanu wale ma ka pā hale ʻoe, ʻo ke kūkulu pā pōhaku a hoʻopihapiha lepo ʻoe, ʻo ke kāpili i pahu no nā mea kanu hōʻono ʻoe, a ʻo ka hoʻokolohua hoʻoulu mea kanu kāmāhuaola wai nō hoʻi.



Ma kēia ʻatikala e kaʻanalike ʻia ai nā keʻehina no ka hoʻomākaukau ʻana i nā ʻanoʻano mea kanu hōʻono e kanu ʻia ma kaʻu pahu māla me nā ʻano mea kanu hōʻono like ʻole.




ʻAkahi - E ʻohiʻohi i nā pono. Ke mākaukau ʻole nā lako, hoʻopaneʻe ʻia ka hana. He hana maʻalahi nō ke kanu ʻana i nā ʻanoʻano. Eia naʻe, inā hapa mai ka mākaukau, e hapa mai ana ka hua. E hōʻoia i ka loaʻa o kēia mau lako, a i ʻole kekahi pani kūpono.

  • He wahi/pākaukau maʻemaʻe e hana ai ma kahi o ka ʻiliwai

  • Ka wai (hoʻohana au i ka wai mai ka ʻiliwai)

  • Nā poho mea kanu

  • Ke kīpulu (hoʻohana au i ka Miracle Grow ma ka hoʻomaka ʻana)

  • Kopalā liʻiliʻi e paʻa ai ma ka lima (inā makemake)

  • Mikilima (inā makemake)

  • Pahu huamoa

  • Nā ʻanoʻano

E kūkulu ʻia ke pākaukau a e waiho ʻia nā lako a pau ma ke pākaukau.


E kanu i nā ʻanoʻano

ʻAlua - E hoʻopiha i ka pahu huamoa i ke kīpulu. He mea ʻano nui kēia, mai hoʻohana i ka lepo. E hoʻohana i ke kīpulu. I mea ke kīpulu e hānai maikaʻi ai i nā ʻanoʻano a ʻoluʻolu ka nohona no ka ulu ʻana aʻe. ʻOi loa aku ka paʻakikī o ka ulu ʻana o ka ʻanoʻano ma loko o ka lepo.


He 12 pōʻai o ka hapa nui o nā pahu huamoa; ʻo kekahi, he 18. E hoʻopiha pono i ka pahu huamoa a piha nā pōʻai a pau o ka pahu (a i ʻole a piha nā pōʻai e like me ka nui o nā mea kanu āu e makemake ana e hoʻoulu).


ʻAkolu - E ʻeli i lua liʻiliʻi ma kēlā me kēia pōʻai o ka pahu huamoa. Ke hoʻomākaukau nei ʻoe i kahi e waiho ʻia ai nā ʻanoʻano. Mai ʻeli i lalo loa a i ka pahu huamoa. E ʻeli i waenakonu o ka pōʻai i lawa kūpono kahi e kanu ʻia ai ka ʻanoʻano.




ʻAhā - E waiho i ka 2-3 paha ʻanoʻano ma kēlā me kēia lua i ʻeli ʻia. E makaʻala i ke ʻano o nā ʻanoʻano i kanu ʻia. Ma koʻu kanu ʻana i nā ʻanoʻano, he kohu piliwaiwai ke ʻano. I kekahi manawa, ʻaʻole ana hua; a i kekahi manawa, e hua mai ana nō. No laila, kanu au i ka 2 a i ka 3 paha ʻanoʻano ma kēlā me kēia puka i ʻoi aku ka papaha o ka puka ʻana mai o kahi mea kanu.


Inā e manaʻo ana ʻoe e kanu i nā mea kanu like ʻole ma ka pahu hoʻokahi, e hoʻomākaukau i nā hōʻailona e hoʻomaopopo ana iā ʻoe i ke ʻano o ia mau mea kanu. Ke kupu mua mai nā ʻōmaka, ʻaʻole ahuwale ka nānā ʻana o ka mea kanu - keu hoʻi inā he mau mana mea kanu kāu e kanu ai.


Noʻu, ua kanu ʻia 2 ʻano ʻōhiʻa lomi me kekahi koliana. Ua kanu au i nā ʻanoʻano ma hoʻokahi pahu huamoa nona he 18 pōʻai. Ua kanu au ma nā lālani: he ʻōhiʻa lomi ʻulaʻula ma kekahi lālani, he koliana ma ka lālani o waena, a he ʻōhiʻa lomi melemele ma kekahi lālani aku. Ua hoʻomaopopo au no ke kanu ʻana i nā ʻanoʻano ʻōhiʻa lomi melemele ma ka ʻaoʻao e waiho ʻia nei ka lepe o ka pahu huamoa.


ʻAlima - E hoʻopulu i ka wai, a waiho ma kahi malu. E hānai i kēlā me kēia lā no ka 2 paha pule.

Mai hoʻopulu nui! E hoʻomanawanui! E hānai liʻiliʻi i kēlā me kēia lā no ka 2 pule a e makaʻala i ka ulu ʻana aʻe!


Maikaʻi ka hānai ʻana i nā kakahiaka nui ma mua o ka haʻalele ʻana no ka hana. Noʻu, ua ʻike au i ke ʻano e maha ai koʻu naʻau ma ka hānai mea kanu ʻana. Nui pū koʻu hauʻoli i ka ʻike ʻana i nā ʻōmaka! Ua waiho ʻia ka pahu huamoa ma lalo o ke kaupoku o ka hale i mau ka pā o ka mea kanu i ka lā.


Ke hala ka 2 paha pule, a ʻike pū ʻia nā ʻōmaka he 2 kiko (a i ʻole 1-2 ʻīniha) ka lōʻihi, ua mākaukau ke kanu ʻana ma nā poho mea kanu.


ʻAono - E hoʻopiha i nā poho mea kanu i ke kīpulu.

E hoʻopihapiha pono i kēlā me kēia poho mea kanu. Aia iā ʻoe ka nui o ka poho. He mau poho liʻiliʻi kaʻu i hoʻohana ai. Inā makemake e hoʻohana i nā poho ʻano nui, ua hiki ke kanu pū ʻia kekahi mau mea kanu. He aʻoaʻo kēia e mālama i kekahi kōā kūpono e ulu ai nā mea kanu.


E like hoʻi me nā kānaka, ʻaʻole ʻoluʻolu nā mea kanu i ka ulu ʻana inā ʻaʻole lawa ka lumi e ulu ai. Eia hou, e make ana nō paha ka mea kanu inā ʻaʻole lawa kūpono ka lumi.


ʻAhiku - E ʻeli i lua liʻiliʻi ma kēlā me kēia poho mea kanu. Me ka ʻelua manamana lima, e ʻeli i lua i lawa kona nui e like me ka nui o nā pōʻai ma ka pahu huamoa.


E ʻohi ana ʻoe i ka mea kanu me ke kīpulu ma kēlā me kēia pōʻai. E hōʻoia i ka lawa kūpono o ka lumi e kanu ʻoluʻolu ʻia ai ka mea kanu me nā aʻa i hua mai ai kekahi.


ʻAwalu - E ʻohi a hoʻonoho hou i nā mea kanu mai ka pahu huamoa a i ka poho mea kanu. E hana mālie. E ʻohi i ka mea kanu ma ka ʻeli mālie ʻana i ka lepo a puni ka pōʻai a laila e ʻeli i lalo loa me ka hōʻoia ʻana, ua ʻohi ʻia nā aʻa o lalo. E like me ka mea i hiki, e hoʻoneʻe i ka mea kanu a waiho ma ka lua o ka poho mea kanu.




ʻAiwa - E hoʻopiha hou i ka poho meakanu i ke kīpulu a paʻa ka mea kanu. E hoʻopaʻa mau ʻoe i ka mea kanu! I loko o kou ʻeli ʻana a waiho ʻana i ka mea kanu ma ka poho mea kanu, e pono ana e hoʻopiha hou i ka poho i ke kīpulu e paʻa pono ai ka mea kanu. He wā huliau kēia no ka mea kanu. Mau hoʻi ka nāwaliwali o ka mea kanu.


Ma ka hoʻopiha hou ʻana i ke kīpulu a puni ka mea kanu, e kākoʻo ana ke kīpulu i nā aʻa a me nā lau o lalo e hiki ai i ka mea kanu ke hoʻopaʻa hou i kona kahua.


ʻUmi - E hoʻopulu i ka wai, a waiho ma kahi malu. E hānai i kēlā me kēia lā no ka 2 paha pule a mākaukau no ke kanu ʻana ma ka pahu māla. Mai hoʻopulu nui! E hoʻomanawanui! E hānai mālie i ka mea kanu a e waiho ma ka malu a i kou ʻike ʻana i kona ulu paʻa ʻana.


Hoʻomanawanui au i ka ulu ʻana o kēlā me kēia mea kanu me ka makaʻala pū i ke kino ʻana mai o kona kino paʻa. Aia a paʻa, e kanu ʻia ka mea kanu mai ka poho mea kanu a i ka pahu māla. I kekahi manawa, hoʻoneʻe au i ka mea kanu ma ka poho mea kanu ma kahi o kona wahi paʻa i mea e maʻa ai ka mea kanu i ia wahi iā ia e ulu ana.



No ia kanu ʻana ma ka pahu māla, hahai ʻia nā keʻehina like o ka ʻohi a kanu hou ʻana. E hoʻi hou mai i kekahi pule aʻe e aʻoaʻo ai no ia keʻehina. Laki maikaʻi e nā hoa!



31 views