No ka hele a hoʻi ʻana paha i ke kulanui...

Ke manaʻo nei au e hoʻi i ke kulanui no kekahi kēkelē hou ma hope o ka hoʻomaha ʻana no ka 6 paha makahiki. Pehea lā au e hoʻokuanaʻike koke hou ai iaʻu iho a kālele ma ka ʻauamo ʻana i nā kuleana kulanui? Kohu mea, lohi loa au ma nā hana a pau ke hoʻohālike ʻia me ka hana a nā hoa kulanui ʻē aʻe.

Inā ʻo ʻoe kekahi hoa o kēia ʻāʻumeʻume, eia kekahi mau manaʻo aʻoaʻo e kākoʻo ana iā ʻoe ma ka ʻimi ʻana i ala e hoʻoholomua ai i nā hana kula.

ʻAkahi. Mai hoʻohālike iā haʻi.

ʻO kēia kāu hana ponoʻī. ʻOkoʻa ke kumu o kou hele kula ʻana i kēlā o kou mau hoa kulanui. ʻOkoʻa kou ʻike, ʻokoʻa kou kuanaʻike, a ʻokoʻa kou nohona. Inā e hoʻohālike ana ʻoe i kekahi, e hoʻohālike iā ʻoe iho. E hoʻomaopopo ʻoe i ke kumu o kou ʻiʻini e hoʻi i ke kula, a e hoʻohālike i nā ala kūpono nou. E paʻakikī ana ka hana inā kau nui ka manaʻo ma ka hana a haʻi; a he hoʻopau manawa nō ia, ʻoiai, ʻaʻohe pōmaikaʻi o ka noʻonoʻo ʻana i kā haʻi me ka paʻa ʻole o kāu hana ponoʻī. Nāu i koho e hoʻi hou i ke kula. E haʻaheo ʻoe i ia koho ʻana a e hoʻohiki iā ʻoe iho e hoʻāʻo maoli i ka hoʻokō.

ʻAlua. E hoʻohiki maoli iā ʻoe iho a e komo ma ka hana. E hoʻoholo e hoʻomakakoho i ka hoʻokō kuleana kulanui ma mua o nā hana ʻē aʻe. Ma kou hoʻohiki ʻana, e hoʻomaopopo i ka hoʻomanawanui ʻana kekahi. E like hoʻi me nā hana maʻa ʻē aʻe a pau (ka hoʻoikaika kino, ka heluhelu, ka hana noʻeau paha), pono ke kanaka e hoʻomaʻamaʻa a kia ma luna o ia hana. E kia ma ia hana, e hoʻoholo e hana, a e hoʻomanawanui iā ʻoe iho. E hoʻoikaika i nā mākau hele kulanui - ka heluhelu, ka noiʻi, ke kālailai, ke kākau, a me ka hoʻokō haʻawina. E paʻakikī ana nō paha kēia hoʻoikaika ʻana, ʻoiai, he wā ʻokoʻa kēia o kou nohona. E pono ana ʻoe e hoʻoikaika a hoʻomaʻamaʻa i kēia mau mākau a paʻa kekahi ʻano ʻōnaehana kūpono nou. Mai hāʻawipio inā pōkole kāu hana ma ka hoʻomaka ʻana.

E kālailai i kāu hana, e makaʻala i nā hemahema a e kakekake i nā keʻehina a paʻa kekahi ʻōnaehana e holomua ai ʻoe. He hoʻomaopopo hou kēia...mai hoʻohālike iā haʻi. E loaʻa ana nā ʻōnaehana paʻa i kekahi o kou mau hoa kulanui. Inā kū ia ʻōnaehana i ka mea e pono ai ʻoe, maikaʻi! Inā ʻaʻohe kōkua o ia ʻōnaehana iā ʻoe, e ʻimi hou ʻoe. He hoʻohiki hikiāloa kēia iā ʻoe iho, e hele mālie.

ʻAkolu. E mālama i kou papa manawa. Ma ka hoʻohiki ʻana iā ʻoe iho, e hoʻomākaukau ʻoe iā ʻoe iho ma ka hoʻonohonoho ʻana i kou papa manawa. He mea kēia e hoʻokaʻawale ai ʻoe i wā e hoʻokō maoli ai ʻoe i ka hana i hoʻohiki ʻia. Ke loaʻa ka wā e kia ai ka manaʻo, e ʻoi aku nō paha kou ʻoluʻolu a mākaukau e hoʻoikaika i nā mākau kulanui. No laila, e hoʻomaka ʻoe ma ka helu papa ʻana i nā mea koʻikoʻi o kou lā. He aha nā hana e pono e hana ʻia, a he aha nā hana i hiki ke hoʻopaneʻe a i ʻole hoʻokakekake ʻia ma kou papa manawa? E makaʻala i nā hola kula, nā hola hana, me nā hola ʻē aʻe e lana pono ai kou mauli a nohona. E kālailai iā ʻoe iho a e wae i nā hola maikaʻi o ka heluhelu, noiʻi, a kākau pepa ʻana. E palapala i nā mea lāliʻi a pau e pono ai kāu mau hana kulanui a e hoʻoholo i nā hola kūpono e kō maoli ai ka hana. E noʻonoʻo i nā hola o ka lā e ʻoluʻolu ai ʻoe i ka heluhelu a kākau, a e hoʻokapu i ia wā e hoʻokō ai i nā hana kulanui.

E ʻoʻoleʻa ʻoe! ʻAʻohe kanaka minamina i ka hiki a hiki ʻole iā ʻoe ke hoʻokō i ka hana. ʻO ka hoʻokō wale nō ka hana e pono ai, no laila, e makaʻala ʻoe i kou pono a e ʻoʻoleʻa ʻoe ma ka mālama ʻana i kou papa manawa. He nohona kanaka kēia, no laila, e ʻōlelo pū au i kēia...e ʻoiaʻiʻo kākou ma ka wānana pū ʻana i nā ālaina, nā ulia, a me ka luhi. Ma ka hoʻomaʻamaʻa ʻana i ke ʻano ʻoʻoleʻa e mākaukau ai kākou i nā wā e pono ai ka hoʻopaneʻe a hoʻololi ʻana i ka papa manawa me ka hoʻokō pū i nā koina. I pani i kēia manaʻo koʻu waiho ʻana i kēia ʻōlelo aʻoaʻo...e hoʻāʻo i ka hoʻokō koke i kekahi hana koʻikoʻi ma ke kakahiaka. E ʻoi loa aku ana kou hauʻoli ma ka holo ʻana o ka lā inā hiki iā ʻoe ke hoʻokō i kekahi o kāu mau hana ma ka hoʻomaka ʻana o ka lā.

ʻAhā. E lawelawe i nā haʻawina me nā lako kulanui me ʻoe MA NĀ WAHI A PAU. ʻAno ʻē loa kēia manaʻo i kekahi mau kānaka, eia nō naʻe, no ke kanaka paʻahana, ʻaʻole kākou ʻike āhea e kaʻawale maoli ai kākou a āhea hoʻi e kupu ai ka ʻiʻini e heluhelu a kākau paha. Nui ʻino ka heluhelu a kākau ʻana ma nā pae laeoʻo a laeʻula - e hoʻomākaukau i ka noʻonoʻo no ia hana.

Noʻu iho, ua lawe au i kekahi puke i ka hale inu! Iaʻu e hoʻomanawanui ana i ka poʻe e hōʻea, ua heluhelu au i kekahi mau ʻaoʻao puke. Pili pū kēia manaʻo i ka ʻōlelo o luna no ka mālama papa manawa ʻana. Ma kēia pōʻaiapili, ua hoʻohiki au e hui me kekahi o koʻu mau hoa. Ua hoʻokaʻaʻike mua naʻe au no ka hōʻea ʻana mai o kahi lā palena pau no kekahi pepa. No laila, ua hōʻoia au i ka hiki ke launa no kekahi wā pōkole. Inā e holo lōʻihi ko mākou hui ʻana, e ʻae lākou iaʻu e lawe pū mai i kaʻu puke e heluhelu ai ke makemake. Ua ʻike koʻu mau hoa no koʻu ʻano, ua kākoʻo lākou i koʻu ʻiʻini e hoʻokō kuleana me ka launa pū, a ua maikaʻi kēia noʻu (ʻo ia hoʻi, ua hiki iaʻu ke kia ma kaʻu puke me ka launa pū). E like me ka ʻōlelo mua, mai hoʻohālike iā haʻi. Maliʻa, e hiki ana iā ʻoe ke lomilomi i kou papa manawa me kēia, ʻaʻole paha. Mau nō naʻe kaʻu aʻoaʻo e lawe i ka haʻawina a lako me ʻoe i nā wahi a pau.

ʻAlima. E hālāwai kūmau me kāu kumu aʻoaʻo. Nona ke kuleana ʻo ke kōkua a kākoʻo ʻana iā ʻoe ma kēia wā. E hōʻike i ka ʻoiaʻiʻo o kou ola, kāu hana, me nā hopohopo āu e manaʻo nei. Nāna e hoʻākāka a aʻoaʻo maoli iā ʻoe i ke ala e hele ai.

ʻAʻole kēia ʻo kaʻu hana - hū ka ʻaka! Akā, eia nō au ma ke alo pali o ke kākau pepa no nā makahiki he nui. Mai hana e like me kaʻu. E ʻimi ʻoe i hālāwai kūmau a hoʻokō.

ʻAono. E walaʻau me kou/kāu ʻohana a i ʻole kou hoa pili. ʻO ia/ ʻo lākou nō hoʻi ke koʻolua e hāpai ana iā ʻoe ma nā wā maikaʻi a paʻakikī o ke ola. Maliʻa, he lālā ʻohana kou/kāu e hele kulanui ana kekahi. Maliʻa, e maikaʻi ana ko ʻolua hoʻopaʻa haʻawina ʻana kekahi me kekahi. Maliʻa paha, ʻaʻohe lālā hele kulanui ma ka ʻohana. Maliʻa paha, e kākoʻo kou/kāu ʻohana iā ʻoe ma ka hoʻomaopopo ʻana iā ʻoe no nā kuleana kulanui. Maliʻa, e hoʻokake ʻia nā kuleana ʻohana e ʻae iā ʻoe e kālele ma nā kuleana kulanui. E walaʻau me ka ʻohana a hoʻoholo i ka mea e pono ai.

I manaʻo pani...Ua manaʻo ʻoe ua hiki. No laila, aia ma loko ou nā lako a pau e pono ai ka puka lanakila ʻana ma kēia ʻimi hoʻonaʻauao ʻana. E kūlia!

No ka hele a hoʻi ʻana paha i ke kulanui

.

Download • 771KB