No ka hoʻomākaukau ʻana i ka wai huaʻai a lauʻai…
He hana nui ka hoʻomākaukau ʻana i nā ʻano wai i ʻuī ʻia. Eia naʻe, he ʻono a pōmaikaʻi maoli nō ka hiki ke inu i kēia wai ke paʻahana ʻoe ma ka pule. He pani maikaʻi kēia no nā wā ʻai, a mau nō ka ʻono a māhuaola e loaʻa ana iā ʻoe. Ua hoʻomākaukau nui au i kekahi mau lekapī wai ʻuī like ʻole iaʻu e hoʻomākaukau ana e makaʻala i koʻu olakino maikaʻi, keu hoʻi ma ka wā hoʻēmi kino a mālama papaʻai. ʻAʻole ʻo kēlā ka maʻamau i kēia mau lā, akā, mau nō koʻu hoʻāʻo e ʻuī wai i kēlā me kēia mahina ke hiki.
E nā hoa e makemake ana e aʻo a hoʻokolohua i wā ʻuī wai, eia kahi aʻoaʻo aloha iā ʻoukou.
Nā lako e pono ai:
(2-4) Pola nui (Aia i ka nui o ka huaʻai a lauʻai e hoʻomākaukau ʻia ana.)
(1) Pola kānana
(1) Papa ʻokiʻoki nui
(1) Pahi ʻoi
(1) Mea ihi
(1) Mīkini ʻuī (Loaʻa nā ʻano mīkini like ʻole. Ma kēia ʻatikala, hoʻohana ʻia ka mīkini Breville.)
(2) ʻEke ʻea (Hoʻohana ʻia nā ʻeke ʻea mai nā hale kūʻai - ka mea hoʻi e hoʻopūʻulu ʻia ai nā huaʻai a lauʻai iā ʻoe e kūʻai hele ana.)
(3-4) Kīʻaha nui (He hoʻokahi kīʻaha no kēlā me kēia huaʻai a lauʻai ʻokoʻa āu e ʻuī ana.)
(4-5) ʻŌmole wai (Loaʻa nā ʻano ʻōmole like ʻole. Ma kēia ʻatikala, hoʻohana ʻia nā ʻōmole “Ball” e mālama ai i ka wai ma ka pau ʻana.)
Nā lauʻai a huaʻai (Ma kēia ʻatikala, ʻo kēia nā lauʻai a huaʻai i hoʻomākaukau ʻia)
(2) Kaʻukama nui
(1) ʻEke kalelē
(8-10) Kāloke
(1) Hala kahiki (Inā ʻaʻole ʻoe ʻono i ka hala kahiki, ua hiki pū ke hoʻohana i kekahi huaʻai momona, e like me nā ʻāpala - he 3-5 ʻāpala i ka hoʻokahi hala kahiki.)
Nā ʻōmole ʻaila dōTERRA (Inā makemake, hoʻohana ʻia kēia i pani no ka lauʻai a huaʻai maoli.)
OnGuard (No ka hoʻomaʻemaʻe i ka ʻili o ka meaʻai.)
Lemi & ʻŌlena (I pani no ka lemi a ʻōlena maoli.)
Slim & Sassy (He ʻaila e kōkua ai i ka pōloli o ka ʻōpū.
ʻAkahi. E hoʻomākaukau i ke kahua.
E hōʻoia i ka mākaukau o nā lako ma kahi pākaukau maʻemaʻe. E hōʻoia i kahi e waiho ʻia ai ka mīkini ʻuī - ma kahi o ka puka uila nō hoʻi. E hoʻomaka ana ʻoe ma ka hoʻomākaukau ʻana i nā lauʻai a huaʻai.
E kaka a i ʻole kū i ka lauʻai me ka huaʻai i ka wai. Kū au i ka meaʻai i ka wai ma nā pola nui no ka 3-5 minuke me ka (3 kulu wai ʻaila dōTERRA OnGuard). He mea nui ka hōʻoia ʻana i ka maʻemaʻe o ka ʻai ma mua o ka ʻuī ʻana. Me ka hoʻohana ʻana i ka ʻaila OnGuard, ua hiki ke ʻike ʻia ka nui lepo e hemo mai ana mai ka ʻili o ka ʻai. He mea nui kēia, ʻoiai, inā ʻaʻole hoʻomaʻemaʻe kūpono ʻia ka ʻai, e mau ana ia lepo ma ka wai i ʻuī ʻia. Ke kani ka 5 minuke, e ʻānana i ka ʻai ma ke pola kānana a kaka hou i ka wai.
ʻAlua. E ʻokiʻoki a ihi i nā lauʻai a huaʻai.
Me ka papa ʻokiʻoki a pahi, e ʻoki i nā ʻaoʻao ʻelua (nā welau) o ke kaʻukama, ke kalelē, ke kāloke, a me ka hala kahiki. E ihi i ke kāloke me ka mea ihi.
E ʻoki a hemo ka ʻili o ka hala kahiki. E ʻokiʻoki i ka hala kahiki ma nā huinahā lōʻihi. ʻO ka mea nui, ua kū ka mānoanoa o ka lauʻai a huaʻai i ke kōā o kahi e hoʻokomo ʻia ai ma ka mīkini ʻuī. Inā ʻoi aku ka mānoanoa, e ʻoki i ka lauʻai a huaʻai paha a kūpono. Waiho au i nā koena ʻai ma kekahi o nā ʻeke ʻea, a kiloi ʻia ke ʻeke holoʻokoʻa ke pau kēia hana. Hiki pū ke hoʻohana ʻia ke koena ʻai ma ka hana kīpulu inā ʻo kēlā kekahi hana ma kou hale. Aia nō a paʻa ia hana iaʻu, e kaʻanalike ʻia.
ʻAkolu. E hoʻomākaukau i ka mīkini ʻuī.
E heluhelu pono i nā ʻōkuhi no kāu mīkini ʻuī ponoʻī. Hoʻohana au i kekahi ʻeke ʻea e uhi ai i kahi e kī ʻia ai ke koena ʻai ma hope o kona ʻuī ʻia ma ka mīkini. He mea nui ka mālama maʻemaʻe ʻana i ka mīkini. E hana mālie ʻoe.
ʻAhā. E ʻuī i ka lauʻai a huaʻai. Loaʻa nā pae like ʻole o ka ʻuī ʻana no kēlā me kēia mīkini, ʻo ia hoʻi ka helu e koho ʻia no ka ʻuī ʻana i nā ʻano ʻai like ʻole (he “1” no nā lauʻai a huaʻai palupalu, a he “5” no nā lauʻai a huaʻai paʻa). ʻUī ʻia ke kaʻukama ma ka “2”, ka hala kahiki ma ka “3”, ke kalelē ma ka “4”, me ke kāloke ma ka “5.”
He hoʻomaopopo. E makaʻala i ke kahe ʻana o ka wai mai ka mīkini a i ke kīʻaha. Ua hoʻolako ʻia kekahi kīʻaha me kaʻu mīkini ʻuī. Hoʻohana au i ia kīʻaha no ka ʻohi ʻana i nā wai lauʻai a huaʻai. Ninini au i ka wai i ʻuī ʻia ma nā kīʻaha nui ʻē aʻe, a hoʻomau au i ka ʻuī ʻana me ia kīʻaha hoʻokahi. E hana mālie ʻoe o heleleʻi ka wai ma ke pākaukau. Hoʻokaʻawale au i nā wai a pau ma ko kona kīʻaha ponoʻī (koe ke kalelē me ke kaʻukama, ʻoiai, hoʻohui pinepine ʻia no nā ʻano lekapī like ʻole). Nui koʻu hauʻoli ma kēia kiʻina hana, ʻoiai, ʻo ia ka wā e ʻike ʻia ai nā ʻano waihoʻoluʻu ikaika o ka lauʻai a huaʻai paha.
Ke pau ka ʻuī ʻana, e hoʻopio i ka mīkini. E heluhelu i nā ʻōkuhi no ka hoʻomaʻemaʻe ʻana i ka mīkini. Hoʻomaka au i ka hoʻomaʻemaʻe ʻana ma hope pono o ka ʻuī ʻana i mea e heheʻe maʻemaʻe ai nā ʻāpana liʻiliʻi o ka ʻai i ʻuī ʻole ʻia a i kī ʻole ʻia i ke ʻeke ʻea. Inā waiho wale ʻia nā ʻāpana mīkini, e maloʻo ana ka wai ʻuī me nā ʻāpana liʻiliʻi a e ʻoi aʻe ana ka paʻakikī o ka wā hoʻomaʻemaʻe. Eia hou, māmā maila ka hana ma ka pau ʻana inā hoʻomaka koke ʻoe i ka hoʻomaʻemaʻe.
ʻAlima. E hoʻohui i nā wai. ʻO kēia kaʻu kiʻina hana punahele loa! ʻAʻole au hoʻohana nui i nā ana ma kēia kiʻina. Hoʻohui au i nā wai i ʻuī ʻia e like me ka mea e hiki ai ke nui aʻe nā ʻōmole wai, a e paipai nui ana au iā ʻoe e hoʻokolohua a ʻike i nā ʻano e ʻono ai ka wai iā ʻoe. Eia naʻe, ʻoiai he hana maʻamau kēia noʻu, eia ka hoʻohuihui ʻana ma ka laulā:
E hoʻohapa i ka wai hala kahiki i ʻelua kīʻaha nui.
E hoʻohuihui i ka hoʻokahi hapa wai hala kahiki me ka wai kalelē ma ka wai kaʻukama. E hoʻohana pū i ka 2-3 paha kulu wai ʻaila lemi a ʻōlena.
E hoʻohuihui i kekahi hapa wai hala me ka wai kāloke. E hoʻohana pū i ka 2-3 paha kulu wai ʻaila lemi a ʻōlena, me ka hoʻokahi kulu wai ʻaila Slim & Sassy.
E hoʻopihapiha i 2 ʻōmole wai (he ʻōmole “Ball” kaʻu i hoʻohana ai”) i ka wai kāloke/hala kahiki.
E hoʻopihapiha i 2 ʻōmole wai i ka wai kaʻukama/kalelē/hala kahiki.
E loaʻa ana nō paha ke koena o ia mau wai ʻelua. E hoʻohui i nā wai ʻelua i hoʻokahi - he wai kaʻukama, kalelē, kāloke, a hala kahiki.
Paʻa maila he 5 ʻōmole wai!
ʻAono. E waiho i ka pahu hau a huʻihuʻi pono. ʻAʻole ʻono loa ka wai ʻuī mehana. Ke pau kāu hana nui, e waiho i nā ʻōmole ma ka pahu hau a hoʻi aku i ka hoʻomaʻemaʻe i nā lako.
ʻAhiku. E inu! Ke inu ʻoe i ka wai, he aʻoaʻo kēia e hoʻokaʻawale i ka wā inu o kēlā me kēia ʻōmole ma ka 2-3 hola. Nui ʻino ka māhuaola o ia wai. E inu mālie a makaʻala i kou kino, keu hoʻi inā ʻaʻole maʻa kou kino i ka inu wai ʻuī.
ʻAwalu. Nā lekapī ʻē aʻe:
Eia kekahi mau lekapī aʻu i hoʻāʻo ai ma ke kūʻai ʻana i: ke kālelē, kaʻukama, kale, pakalī, hala kahiki, kāloke, pike, me ka wai niu…e like me kaʻu ma ka wehewehena o luna, hoʻohana au i ka ʻaila dōTERRA i pani no ka lemi me ka ʻōlena.
Maikaʻi no ka hoʻomaʻemaʻe ʻana i ka ʻōnaehana o ke kino:
Kalelē, Kaʻukama, Kale, Lemi, Pakalī.
He hoʻōla olakino:
Hala kahiki, Kalelē, Kaʻukama, Kale, Lemi.
Kāloke, Hala kahiki, ʻŌlena.
Wai niu, Pike, Hala kahiki, ʻŌlena.
