Ka Nānaina o Ka Hawaiʻi

He hāpai a hoʻokahakaha i nā uʻi like ʻole o ka Hawaiʻi ma ka nānā i nā kiʻi i paʻi ʻia o nā ʻōpio o ke kenekulia i hala aku nei.


Na Caroline Haskins Gurrey i paʻi ma nā makahiki 1905-1909.

Ua loaʻa mai ka Waihona ʻAhaʻōlelo Nui.



He nānaina kikoʻī ko ka Hawaiʻi? Ua loaʻa nō ka ʻaʻahu e hoʻokohu a hōʻike aku ai ke kanaka i kona ʻano he Hawaiʻi: ʻo ke kīkepa ʻoe, ʻo ka malo ʻoe, ʻo ka ʻahuʻula ʻoe, a pēlā wale aku nō. ʻAʻole naʻe ia ʻo ka mea e walaʻau ʻia nei, ʻoiai, ua hiki ke ʻaʻahu ka poʻe a pau i ia mau mea i kohu i ka Hawaiʻi. Me ka loaʻa ʻole o ia mau ʻaʻahu, ua hiki ke kuhi ʻia ke kanaka he Hawaiʻi ma kona nānaina?


He 200,000 a ʻoi poʻe ma Hawaiʻi Pae ʻĀina i kaha he Hawaiʻi ma ka heluna kanaka o ka MH 2010. ʻEkolu hapahā o ia 200,000 a ʻoi, ua kaha he hapa Hawaiʻi i ʻānoni ʻia me kekahi lāhui ʻē aʻe. He hiʻohiʻona laha nō ia o ka Hawaiʻi o ke au nei. No laila i mio loa ai kēia poʻe kiʻi o ka ʻōpio Hawaiʻi i paʻi ʻia ma ka hoʻomaka o ke kenekulia aku nei. ʻOiai, no kekahi hapa nui o kākou he mau lāhui, he ʻekolu a ʻoi nō paha. Ma kēia mau kiʻi i ʻike ʻia ai ia mau hua o ka huina ma waena o ka Hawaiʻi me ka lāhui ʻē.


Na Caroline Haskins Gurrey kēia mau kiʻi i paʻi. Mai nā MH 1905-1909, ua paʻi ʻo ia he 50 a ʻoi paha kiʻi o nā ʻōpio Hawaiʻi piha a hapa Hawaiʻi. ʻO kekahi hapa o lākou, he poʻe o ke Kula ʻo Kamehameha. No kekahi o ia mau kiʻi, ua palapala ʻia he Hawaiʻi i ʻānoni ʻia me ke koko aha lā. ʻO ka mea ʻāpiki, ʻaʻole i ili mai nā inoa o ka poʻe ma ke kiʻi. He nanea nō naʻe ke nānā aku.


Na Caroline Haskins Gurrey i paʻi ma nā MH 1905-1909.

Ua loaʻa mai ka Waihona ʻAhaʻōlelo Nui.


ʻO kēia kiʻi ma ka hema, ua kapa ʻia “Ke Keiki o Hawaiʻi.” ʻO ka mea o waena, ʻaʻole nui ka ʻike i ili mai ʻo “he kiʻi o ka wahine ʻōpio” ka ʻike i pākuʻi ʻia. ʻO ia kiʻi ma ka ʻākau, ʻo ka ʻike i loaʻa ʻo ia nō, “he keiki kāne koko Hawaiʻi piha.” ʻO ia mau hiʻohiʻona nohea o ka Hawaiʻi kā kākou e noʻonoʻo mau ana no nā kūpuna Hawaiʻi piha o kākou.


Na Caroline Haskins Gurrey i paʻi ma nā MH 1905-1909.

Ua loaʻa mai ka Waihona ʻAhaʻōlelo Nui.


ʻO kēia mau keiki kāne ʻelua he hapa Hawaiʻi, hapa Pākē. ʻO nā kiʻi ma ka hema, ua kapa ʻia ia mau kiʻi ʻo “Ka Lawaiʻa.” ʻO nā kiʻi ma ka ʻākau, ua kapa ʻia ʻo “Ka ʻālapa.” He hoihoi ke kapa ʻia o ua mau kiʻi penei, ʻoiai, ʻaʻole nui ka ʻike i ili mai me ia mau kiʻi. Maliʻa, he lawaiʻa a he ʻālapa kēia mau keiki kāne a i ʻole he mau inoa i kapa wale ʻia ai ke kiʻi i pili paha i ko lāua nānaina.


Na Caroline Haskins Gurrey i paʻi ma nā MH 1905-1909.

Ua loaʻa mai ka Waihona ʻAhaʻōlelo Nui.


He mau keiki hapa haole kēia. Ma ka hema, he Hawaiʻi, hapa Kekokia. ʻO ko waena, he Hawaiʻi, hapa Pūkīkī. ʻO ka mea ma ka ʻākau, he Hawaiʻi, hapa Paniolo. Ma ka nānā ʻana, kohu Hawaiʻi piha ke nānā aku i ke keiki kāne hapa Paniolo. ʻAʻole anei?

Na Caroline Haskins Gurrey i paʻi ma nā MH 1905-1909.

Ua loaʻa mai ka Waihona ʻAhaʻōlelo Nui.


Eia hou mai he mau kaikamāhine hapa Haole. ʻO ka hema, he Hawaiʻi, hapa Nolewai. Ma waena, he Hawaiʻi, hapa Palani. ʻO ka ʻākau, he Hawaiʻi, hapa Kelemānia. Hoihoi ka ʻike ʻana no ka Hawaiʻi hapa Palani, ʻoiai, ua ahuwale nō kona ʻano he hapa Hawaiʻi. No nā mea ʻē aʻe ʻelua, ʻaʻole nō ʻike ahuwale ʻia ka ʻaoʻao Hawaiʻi ma nā hiʻohiʻona o ka helehelena.


He mau kiʻi hou aku e loaʻa mai ke ʻimi aku ʻoe i ka inoa o kēia mea paʻi kiʻi ʻo Caroline Haskins Gurrey. He mahalo nō hoʻi ka loaʻa o kēia mau momi e ʻike ai kākou i ka Hawaiʻi o ke au i hala. ʻO ka mea mio loa, he mau kānaka Hawaiʻi o kēia au e paʻi ana i nā kiʻi o kākou i paʻa no ka hanauna ma hope mai. ʻO ko kākou nanea ʻana i ka nani o kēia mau helehelena waipahē o nā Hawaiʻi o ke au i newa loa akula, he ala ia e hoʻomaopopo ai kākou iā kākou iho, he mau nānaina ʻokoʻa a nohenohea ko ka Hawaiʻi.

63 views